शीतलपाटीन्युज डटकम।
काठमाडौं। राष्ट्रपति रामचन्द्र पौडेलले संघीय संसद् बैठक आह्वान गर्नुभएको छ। मंगलबारको मन्त्रिपरिषद् बैठकको सिफारिसमा यही वैशाख १७ गते बिहीबार दिउँसो २ बजेका लागि राष्ट्रपति पौडेलले दुवै सदनको अधिवेशन आह्वान गर्नुभएको हो। यो अधिवेशन बजेट अधिवेशन पनि हो। जेठ १५ गते सरकारले आगामी आर्थिक वर्षका लागि संसद्‌मा बजेट पेस गर्नुपर्छ। बजेटअघि प्रि-बजेट छलफलसमेत हुनेगर्छ।

यसअघि गत फागुन २१ गते भएको निर्वाचनपछि चैत १९ गते संसदको पहिलो अधिवेशन आह्वान भएको थियो। सो अधिवेशनले प्रतिनिधिसभाको सभामुखमा डोलप्रसाद अर्याल र उपसभामुखमा रुबीकुमारी ठाकुर तथा राष्ट्रियसभाको उपाध्यक्षमा लीलाकुमारी भण्डारीलाई निर्वाचित गरेको छ।

यस्तै प्रतिनिधिसभाका समितिहरूका सभापतिको निर्वाचन पनि भएको छ भने प्रतिनिधिसभाको नयाँ नियमावली मस्यौदा गर्न समिति गठन भएको समितिले सभामुख अर्याललाई प्रतिवेदन पनि बुझाएको छ।

(कान्तिपुर टीभी)