सुरेश कोईराला,
बाल्टीमोर,अमेरीका। लमजुङ जिल्लाबाट रोजगारी शिलशिलामा मेरिल्याड राज्यमा DC मेट्रो क्षेत्रमा स्थायी वा अस्थायी रूपमा बसोबास गर्दै आएका लमजुङवासीहरूको साझा पहलमा “लमजुङ समाज” गठन गरिएको थियो।

समाजको स्थापना विशुद्ध सामाजिक सेवा,आपसी सद्भाव, सहयोग र एकताको भावनालाई प्रवद्र्धन गर्ने उद्देश्यले गरिएको बताइएको छ। जन्मथलो लमजुङबाट मेरिल्याड आइ विभिन्न पेशा,व्यवसाय तथा सेवामा आबद्ध लमजुङवासीहरूबीच आत्मीय सम्बन्ध,भाइचारा,सहकार्य तथा सामाजिक सद्भावलाई थप सुदृढ बनाउने समाजको मुख्य लक्ष्य रहेको जनाइएको छ।

समाजले लमजुङवासीहरूलाई एक साझा मञ्चमा आबद्ध गर्दै सामाजिक,सांस्कृतिक तथा रचनात्मक गतिविधिहरू सञ्चालन गर्ने योजना अघि सारेको छ। साथै,सदस्यहरूबीच आपसी सहयोग, समन्वय र सहकार्यको वातावरण निर्माण गरी समुदायको हितमा विभिन्न कार्यक्रम सञ्चालन गरिने समाजले जनाएको छ ।

समाजका उद्देश्य तथा कार्यक्रमहरूलाई प्रभावकारी रूपमा सञ्चालन गर्दै संस्थागत विकासलाई सुदृढ बनाउन कार्यसमिति तथा सल्लाहकार समिति समेत गठन गरिएकोथियो नवगठित समितिहरूले समाजको दीर्घकालीन उन्नति,सामाजिक उत्तरदायित्वको प्रवद्र्धन तथा सदस्यहरूबीचको सम्बन्धलाई अझ मजबुत बनाउने विश्वास व्यक्त गरिएको छ।

समाजले आगामी दिनमा सामाजिक एकता,पारस्परिक सहयोग र समुदायको समग्र विकासका लागि सक्रिय भूमिका निर्वाह गर्ने प्रतिबद्धता जनाएको छ। यही आउँदो जुलाई १२ मा बनभोज कार्यक्रम तयार गरेको छ।