काठमाडौँ– कांग्रेसका तर्फबाट प्रतिनिधिसभा १ का उम्मेदवार प्रकाशमान सिंह र प्रदेशसभा (१- क) का उम्मेदवार दिपेन्द्र श्रेष्ठले स्थानीयसँग अन्तरक्रिया गरेका छन्।

काठमाडौँ महानगरपालिका–१० बुद्धनगर घिमिरे निवासमा आज उक्त कार्यक्रमको आयोजना गरिएको थियो । कार्यक्रममा सामाजिक विकासको, गुणस्तरीय शिक्षा र स्वास्थ्य साथसाथै विगतका प्रगति विवरणका विषयमा छलफल भएको थियो।

नेता सिंह काठमाडौँ-१ बाट प्रतिनिधिसभा सदस्यका लागि चौथो पटक प्रतिस्पर्धामा रहेका छन् ।

यस क्षेत्रमा २०६४ सालदेखि कांग्रेसले जित्दै आएको छ। २०७४ को प्रतिनिधिसभा निर्वाचनमा सिंहले १० हजार ९ सय ३६ मत ल्याएर विजयी भएका थिए।

उनले विवेकशील साझा पार्टीका रवीन्द्र मिश्रलाई ८ सय १८ मतान्तरले पराजित गरेका थिए। नेता सिंह संविधानसभा सदस्य निर्वाचन २०६४ र २०७० र संसदीय निर्वाचन २०७४ मा लगातार सोही क्षेत्रबाट विजयी भएका छन् ।

यसैगरी नेपाल विद्यार्थी संघमा २०५० सालदेखि समावेश भएर राजनीतिक जीवन सुरु गरेका कांग्रेस नेता श्रेष्ठ दोस्रो पटक चुनावी मैदानमा छन्। यसअघिको निर्वाचनमा सोही क्षेत्रबाट निर्वाचित भएका उनी बाग्मती प्रदेश सरकारका मन्त्रीसमेत थिए।