२२ जेष्ठ, २०८१
शीतलपाटीन्युज डटकम।
लन्डन। बेलायतवासी समाजसेवी एवं मेन्टल हेल्थ कम्युनिटी नर्स सुष्मा गुरुङले सञ्चालन गरेको कार्यक्रम ‘कुराकानी’को १००औ एपिसोड पूरा भएको छ। सुष्मा गुरुङ मुख्य सञ्चालक रहेको यस कुराकानी कार्यक्रममा डा.विशाल गुरुङ, डा.जित गुरुङ र डा.विजय लगायत चिकित्सकको टोली सञ्चालकका रूपमा रहेका छन्।
यसमा मुख्य रूपमा मानसिक स्वास्थ्य र स्वास्थ्यका अन्य विषयमा यसमा कुराकानी हुने गरेको छ। यो कार्यक्रम पछिल्लो समय बेलायतमा रहेका नेपाली समुदायबीच निकै लोकप्रिय छ। ग्रेटर रसमोर नेपाली कम्युनिटीको आयोजनामा हरेक मंगलबार बेलुका ७ देखि ९ बजेसम्म कार्यक्रम प्रसारण हुने गरेको छ।
यस शृंखला १०० औ इपिसोड पुगेको अवसरमा आइतबार एक विशेष अन्तरक्रियाको आयोजना गरिएको थियो। शिव कल्चरल एन्ड कम्युनिटी सेन्टर क्विन्स रोड अल्डरसटमा भएको अन्तरक्रियामा १०० जनाभन्दा बढीको उपस्थिति रहेको थियो। दिउँसो १ देखि ५ बजेसम्म भएको कार्यक्रममा गोर्खा पेन्सनरहरू,स्वास्थ्य कार्यकर्ता तथा सामाजिक अभियन्ताहरूको उपस्थिति थियो।
सुष्मा गुरुङले सञ्चालन गरेको अन्तरक्रिया कार्यक्रमको अध्यक्षता ग्रेटर रस्मुर नेपाली कम्युनिटीका अध्यक्ष मान गुरुङले गरेका थिए भने शिव मन्दिरका पुर्व अध्यक्ष रोहित गुरुड्ग र योगा प्रशिक्षक मेघ गुरुड्गको पनि उपस्थिती रहेको थियो। यस कार्यक्रमलाई अझ प्रभावकारी वनाइने निर्णय भएको छ।
यो कार्यक्रममा सामुदायिक स्वास्थ्य सल्लाहकार निशा शर्मा,डा.रबि पन्त,न्युट्रीशनीष्ट धिरज घले,सामाजिक अभियन्ता रोहित गुरूंग समेत थप्ने कार्यक्रम रहेको छ।
यस कार्यक्रमलाइ सहयोग गर्ने डेनटिष्ट नर्स प्रमिला लाबुंग राइ,डा देउमान गुरूंग,गोमा राना,भिम तामांग र डा़ लता सत्यालको प्रशंसा गरीयको थियो।जसमा एनएचएस मेन्टल हेल्थ कम्युनिटी हेल्थ सेन्टरबाट क्यारोल मोरेको पनि उपस्थिति थियो। उनले सुष्मासँग प्रतिबद्धता जनाइ नेपाली समुदायका लागि यो कार्यक्रम गराइएको हो।
डा.जित,फार्मासिस्ट सोम थापा,डा.विजय अधिकारी, सुष्मा गुरुङ,योगा कन्स्ट्रक्टर मेघ गुरुङ तथा डा.विशाल गुरुङ समेतले गरेको अन्तर्क्रियामा गोर्खा अग्रजहरूले सहभागिता जनाएका थिए। स्वास्थ्य र मानसिक रूपमा कसरी आफू राम्रो हुनुपर्छ र एक आपसमा सरसहयोग के कसरी गरिन्छ भन्नेबारे कुराकानी भएको थियो। कार्यक्रममा वरिष्ठ मेन्टल हेल्थ नर्स राजेन्द्र क्षेत्री पनि सहभागी थिए। हाल रिटायर्ड भइसकेका क्षेत्री युकेका पहिलो नेपाली नर्ससमेत हुन्।
सो अवसरमा ‘कुराकानी’ कार्यक्रम १०० औ शृंखलासम्मको यात्राबारे समीक्षात्मक छलफलसमेत भएको थियो। शिव कल्चरल एन्ड कम्युनिटी सेन्टरका अध्यक्ष विक्रम भट्टराईले पनि आफ्नो विचार राखेका थिए। यो एक नितान्त सामुदायिक काम रहेको ग्रेटर रसमोर नेपाली कम्युनिटी युकेले जनाएको छ। नेपाली स्वास्थ्यकर्मी,डाक्टर तथा नर्स, योगाका प्रशिक्षकहरू, पोषणविद्का साथै सामाजिक अभियन्ता सहभागी भएको कार्यक्रममा आपसी भेटघाटको अवसर पनि जुरेको सहभागीले जनाएका छन् ।
सुष्माले नेपाली समुदायबीच मानसिक स्वास्थ्यबारे सचेतना फैलाउने उद्देश्यले दुई वर्षअघि कुराकानी कार्यक्रम सुरु गरेकी थिइन्।
