१८ आश्विन, २०८१
शीतलपाटीन्युज डटकम।
लन्डन- गैरआवासीय नेपाली संघ (एनआरनए) यूकेले लन्डन दूतावास नियोगका नयाँ अफिसियलहरुलाई स्वागत गरेको छ।
विहीबार अध्यक्ष हितकाजी गुरुङ नेतृत्वमा दूतावास पुगेर संघको टोलीले दूतावासको जिम्मेवारी सम्हाल्न हालै लन्डन आइपुगेका अधिकारीहरुलाई स्वागतसंगै अन्तरक्रिया समेत गरेको हो।लन्डन दूतावासका उपनियोग प्रमुख विपिन दुवाडी,फर्स्ट सेक्रेटरी उद्धव न्यौपाने र थर्ड सेक्रेटरी झुपलाल पुनलाई एनआरएनए यूकेका तर्फबाट अध्यक्ष हित काजी गुरुङले पुष्पगुच्छा र खादाले स्वागत गरेको हो।
नियोगका डिप्लोम्याटहरुको स्वागतका लागि एनआरएनए यूके महासचिव गोविन्द शर्मा खरेल, कोषाध्यक्ष विष्णु खरेल, इंग्ल्यान्ड परिषद अध्यक्ष शम्भुप्रसाद अर्याल सहित एनआरएनए यूके र आइसीसीका प्रतिनिधि समेत दूतावास पुगेका थिए।
सो अवसरमा लन्डन दूतावास र एनआरएनए यूकेबीच यसअघि रहंदै आएको निकट सहकार्य र सहयोगको सम्बन्धलाई निरन्तर र सुदृढ गर्दै जानेबारे दुवै पक्षबाट प्रतिवद्धता व्यक्त गरिएको महासचिव गोविन्द शर्मा खरेलले जानकारी दिए।
सो अवसरमा अध्यक्ष हित काजी गुरुङले लन्डन दूतावासलाई एनआरएन यूकेले पनि अभिभावक संस्थाका रुपमा लिएको उल्लेख गर्दै आगामी दिनमा पनि सोही खालको संरक्षण र मार्गदर्शन प्राप्त हुने विश्वास व्यक्त गरे।
उपनियोग प्रमुख दवाडीले दूतावास बेलायतस्थित सम्पूर्ण नेपालीको सहयोगका लागि तत्पर रहेको जनाउँदै एनआरएनए यूकेसंग सहकार्यका लागि आफूहरु पनि उत्सुक रहेको जनाए।
