३० जेष्ठ, २०८२
शीतलपाटीन्युज डटकम।
लन्डन। बेलायतमा हुन लागेको मगर संघ युकेको ओपन कन्सर्टलाई भब्य र मनोरन्जन युक्त बनाउन नेपालबाट चर्चित कलाकार अन्जु पन्त,खेम सेन्चुरी र विजय ठाडामगर बेलायत आई पुगेका छन्। कलाकारहरुलाई मगर संघ यूकेले शनिबार १४ जुन २०२५ तारिखका दिन बेलायतमा आयोजना गरेको १७ औं नेपाली ओपन कन्सर्टका लागी बुधबार राति लन्डनस्थित हिथ्रो विमानस्थल ओर्लिए स्वागत गरीएको थियो।
कलाकारहरुमा सेन्चुरी भ्वाइस अफ नेपाली सिजन ६ का कोच तथा चर्चित सर्जक हुन् । गायिका अन्जु पन्त सदाबहार आधुनिक गायिकाका रुपमा परिचित छिन् भने ठाडामगर भ्वाइस अफ नेपाल सिजन ३ मा टप १२ मा पर्न सफल कलाकार हुन्। कलाकारहरुलाई स्वागत गर्न मगर संघ युकेका अध्यक्ष लालबहादुर (लालु) पुन मगर, कार्यक्रम प्रमुख संयोजक तथा उपाध्यक्ष रुद्र थापामगर, उपाध्यक्ष विष्णु श्रीस मगर, मगर संघ युकेका उपाध्यक्ष गुमानसिं थापामगर,महासचिव गोमानसिंह पुन, कोषाध्यक्ष मोहन थापामगर,निवर्तमान अध्यक्ष सीता पुन मगर,सांस्कृतिक सचिव नुनु पाइजामगर, सहसांस्कृतिक सचिव रुक आलेमगर, पूर्वसांस्कृतिक सचिव सरु रानामगर,मगर महिला संघ यूकेकी महासचिव मनु पाइजामगर,युवा विभागका अध्यक्ष दीपक माइथाने मगरलगायतका पदाधिकारीहरु,कार्यसमिति सदस्यहरु र शुभचिन्तकहरु विमानस्थल पुगेका थिए।
'म्यूजिक फर युनिटी’ सन्देशसहित फार्नबोरोस्थित रग्बी फुटबल क्लबमा बिहान ११ देखि बेलुकी ८ बजेसम्म कन्सर्ट हुनेछ। उनीहरुसँगै बेलायतका स्थानीय कलाकारहरूले नृत्य पनि प्रस्तुत हुनेछ।
मगर संघ यूकेले हरेक वर्ष आयोजना गर्ने मगर गट ट्यालेण्टका विजेताहरूले पनि प्रस्तुति दिनेछन्। उक्त कार्यक्रममा बालबालिकाका लागि मनोरन्जनात्मक खेलका साथै युवा,बयस्क र ज्येष्ठ नागरिक सबैलाई मनोरन्जन दिने सांस्कृतिक कार्यक्रम प्रस्तुत हुने आयोजकको भनाइ रहेको छ।
बेलायतका लागि नेपाली राजदूत चन्द्रकुमार घिमिरे प्रमुख अतिथि रहने कार्यक्रममा स्थानीय निकायका मेयर,उपमेयर, काउन्सिलरहरूका साथै बेलायतस्थित विभिन्न नेपाली संघसंस्थाका अध्यक्ष प्रतिनिधिहरू अतिथि रहेछन् ।
सन् २००२ सालमा स्थापना भएको मगर संघ यूकेले बेलायतमा जात धर्म,नेपाली गीत,संगीत,कला,संस्कृतिको समान रुपमा प्रस्तुत गर्न,जगेर्ना गर्न र र प्रवर्द्धन गर्ने उद्देश्यले सन् २००६ देखि हरेक वर्ष नेपाली ओपन कन्सर्ट आयोजना गर्दै आएको छ।
