९ फाल्गुन, २०७५
शीतलपाटीन्युज डटकम।
पोखरा, नेपाल। नेपाली राष्ट्रिय फुटबल टोलीका गोलकिपर किरण चेम्जोङलाई सहारा क्लब पोखराले वर्षको उत्कृष्ट खेलाडी २०७४ बाट सम्मान गर्ने भएको छ । आजबाट शुरू हुने आहा रारा गोल्डकप फुटबल प्रतियोगिताको १७ औं संस्करणको उद्घाटनका दौरान किरणलाई सम्मान गर्न लागिएको हो ।
सहारा क्लव पोखराले यो वर्षदेखि राष्ट्रिय टोलीमा रहेका एक खेलाडीलाई सम्मान गर्ने परम्पराको थालनी गर्न लागेको हो। गत वर्ष राष्ट्रिय टोलीका फरवार्ड भरत खवासलाई सम्मान गरिएको थियो । खेलाडीहरूलाई प्रोत्साहन गर्न त्यसअघि पनि क्लबले पुराना खेलाडीलाई सम्मान गर्दै आएको थियो । राष्ट्रिय टोलीका पहिलो रोजाईका गोलकिपर किरणले यो सिजन माल्दिभ्सको टिसी स्पोर्टसबाट व्यवासायिक फुटबल खेलेका थिए ।
उनको उच्च प्रदर्शनबाट प्रेरित टोली माल्दिभ्सको लिग च्याम्पियन बनेको थियो । किरण लिगको उत्कृष्ट गोलकिपर समेत चुनिएका थिए । किरण सम्मान ग्रहण गर्नका लागि पोखरा पुगीसकेको समाचार छ। सहारा क्लब पोखराको आयोजनामा सुरु हुने १७ औ आहा गोल्ड कपमा १० टोलीको सहभागिता रहेको छ । उद्घाटन खेल आयोजक सहारा क्लव पोखरा टोली र शसस्त्र प्रहरी एपिएफ क्लबबीच हुँदैछ ।
प्रतियोगिताको विजेता टोलीले ८ लाख १ हजार र दोस्रो हुने टोलीले ४ लाख १ हजार रुपैयाँ पाउनेछन् । ( हाम्रो खेलकुद )
