Sunday November 27, 2022

विश्व श्रम बजारमा रहेका नेपाली श्रमिक प्रति  एनआरएनए संवेदनशील छ: कुमार पन्त

१९ भाद्र, २०७६ शीतलपाटीन्युज डटकम। 6456


विश्व श्रम बजारमा रहेका नेपाली श्रमिक प्रति  एनआरएनए संवेदनशील छ: कुमार पन्त

शीतलपाटीन्युज डटकम।

लन्डन। गैरआवासीय नेपाली संघका उपाध्यक्ष एवं आगामी अध्यक्षका प्रत्यासी कुमार पन्तले विश्व श्रम बजारमा रहेका नेपाली श्रमिकको मुद्दामा गैरआवासीय नेपाली संघ संवेदनशील रहेको बताउनुभएको छ। गैर आवासीय नेपाली संघ राष्ट्रिय समन्वय परिषद् मलेसियाको छैँठौँ महाधिवेशनमा सम्बोधन गर्दै पन्तले स्थापनाकालदेखि नै संघले श्रमिकको मुद्दाप्रति संवेदनशील रहीआएको बताउनुभएको हो ।  सन् २०१५ को स्मरण गर्दै पन्तले भन्नुभयो, “म साथीहरुलाई स्मरण गराउन चाहन्छु, कि हामीले सन् २०१५ मै उद्घोष गरेका थियौँ कि, गैरआवासीय नेपाली संघको अबको प्रमुख कार्यभार भनेको श्रमिकहरु बसेको ठाउँमा रहन्छ भनेर।”

श्रमिकको विषयमा संघले गम्भीरतापूर्वक सोचेरै श्रमिक कल्याणकारी कोषको स्थापना गरेको दोहोर्याउँदै पन्तले भन्नुभयो, “हामीले श्रमिक कल्याणकारी कोषको समेत स्थापना गर्यौँ, जसमा तत्कालिन अध्यक्ष शेष घले ज्यू र वर्तमान अध्यक्ष भवन भट्ट ज्यू एक - एक करोड राख्नुभयो र म लगायत हामी सबैले पनि केही रकम जम्मा गरेका छौँ ।” उहाँले थप्नुभयो, “त्यतिबेला हामी के निष्कर्षमा पुगेका थियौँ भने अब गैरआवासीय नेपाली संघ मुख्यगरी, श्रमिकहरुको बीचमा रहनुपर्छ, विशेषगरी श्रम गरेर देशमा रेमिटया्न्स पठाएर अर्थतन्त्रलाई धान्ने साथीहरुको माझमा संघलाई लिएर जानुपर्छ भनेर, तर बिड्म्बना त्यतिबेलै नेपालमा भूकम्प गयो र संघको सम्पूर्ण श्रोत र शक्ति पुर्ननिर्माण केन्द्रित भयो, जसका कारण हामीले घोषणा गरेको श्रमिकको माझमा आउने योजनालाई दोश्रो प्राथमिकतामा राख्नुपर्ने बाध्यता हामीमाझ रह्यो ।” पन्तले भन्नुभयो, “तर साथीहरु अब भने हामी त्यो जिम्मेवारी जुन पुर्ननिर्माणको रहेको थियो त्यसको लगभग अन्त्यतिर छौँ, र अब संघ मुख्यगरी श्रमिक माझ जाने प्रण गरेर तपाइमाझ आएको छ ।”

श्रमिक कोषलाई निरन्तरता दिई थप बलियो अघि बढाउने रणनीति संघले अघि सारेको पन्तको भनाई थियो । कोषमा हाल रहेको केही रकमलाई दोब्बर बनाउने लक्ष्य संघको रहेको उहाँको भनाई थियो ।  “अबको दुई वर्षमा कोषलाई कमसेकम दोब्बर बनाउने कुराको प्रतिबद्धता यो संघ गर्दछ ।” उहाँले भन्नुभयो, “चाहे त्यो म नेतृत्वमा आओस् चाहे अन्य साथीमार्फत, जे होस् यो जिम्मेवारी संघको प्रमुख जिम्मेवारी हो।”

विदेशमा नेपालीले कमाएको पूँजीदेखि सीपसम्म  आफ्नै मातृभूमिमा लगानी गर्ने वातावरण निर्माण गर्ने बाटोमा देखिएका कानूनी व्यवधान समेत समाधान भइसकेको र अब नागरिकताको विषयमा समेत संघ र सरकारबीचको सम्वादले सकारात्मक मोड लिइरहेको उहाँको भनाई थियो। विशेष गरी रेमिटयान्समार्फत मुलुकमा पठाएको रकम अनुत्पादक क्षेत्रमा खर्च भइरहेको बताउँदै उहाँले अब भने सो रकमलाई रोजगारको अवसर सिर्जना गर्ने उत्पादनमुलक क्षेत्रमा लगानी गर्नुपर्नेमा जोड दिनुभयो त्यसका लागि संघ प्रतिबद्ध रहेको पन्तले जानकारी गराउनुभयो ।

श्रमिकको विषय भिजन २०२० मा समेत प्राथमिकताका साथ लिपिबद्ध गरेको पन्तले बताउनुभयो। विशेषगरी मलेसिया लगायतका अन्य विश्वभरका श्रम बजारमा रहेको नेपालीहरुले कमाएको पूँजी मात्र नभई उनीहरुले सिकेका ज्ञान, सीप र प्रविधि समेत नेपालमा भित्र्याउने कामको थालनी संघले गरिसकेको स्मरण गराउँदै पन्तले विदेशबाट नेपालमा फर्कदा समेत बेरोजगार बस्नु पर्ने बाध्यताको अन्त्य गर्न संघले विभिन्न योजना अघि सारेको बताउनुभयो ।

“म त भूकम्पले थलिएके गोरखाको मान्छे, म अक्सर त्यहाँ जाँदा देख्नु त्यहाँ काम गर्ने अधिकांश मजदूर भारत लगायत मुलुकका छन्, र खाडी मुलुकमा हाम्रा नेपाली दाजूभाईले कमाउने भन्दा बढी तलब लिएर काम गर्छन्” पन्तले भन्नुभयो, “साथीहरु के हामी आफैँ हाम्रै मुलुकमा अरुले कमाउने जति पैसा कमाउन र आर्थिक जोहो गर्न सक्दैनौँ ?”

 गैरआवासीय नेपाली संघले मुलुकमै दक्ष जनशक्ति उत्पादन गर्न विभिन्न सीपमुलुक तालिमको सञ्चालन गर्ने योजना अघि सारी त्यसको थालनी समेत गरिसकेको पन्तले जानकारी गराउनुभयो । “विशेषगरी हामीले ७ वटै प्रदेशमा दक्ष जनशक्ति उत्पादन गर्न सीपमुलक तालिमको अवधारणा ल्याएका छौँ, त्यसको सुरुवात प्रदेश ३ बाट गरिसकेका छौँ, पन्तले भन्नुभयो। “संघको सहकार्यमा जर्मनीको एउटा एनजीओले काम सुरु गरिसकेको छ, साथीहरु यो कदमले नेपालले अदक्ष कामदार मात्रै विश्व श्रम बजारमा पठाउँछ भन्ने कुरालाई गलत साबित गर्नेछ।”

नेपालमा १० अर्बको सामुहिक लगानी कोषको स्थापनाको विषयमा विद्यमान गलत किसिमका अफवाह र भ्रमबाट मुक्त भई लगानीका लागि तयार रहन समेत पन्तले आग्रह गर्नुभयो। प्रत्येक श्रमिकको पाँच, दश डलरदेखि साना ठूला व्यवसायीको करोडौँको लगानी सो कोषमा समेटेलिने पन्तले बताउनुभयो। साना लगानीकर्तालाई प्रवद्र्धन गर्ने लक्ष्य संघले राखेको उहाँले बताउनुभयो ।

फरक प्रसंगमा, पन्तले गैरआवासीय नेपालीहरुलाई सदस्यता लिएर त्यसबाट प्राप्त गर्न सकिने सुविधा उपभोग गर्न अनुरोध गर्नु भयो। पुर्व अध्यछ्य शेष घलेको भीजन वियोन्ड २०२० लाई आधार मानेर महिला, युवा र दोश्रो पुस्तालाई अगाडी बढाउन सबैको प्रयास जरूरी हुन्छ।



सम्बन्धित शीर्षकहरु

यसपाली को world Cup कसले जित्ला?