काठमाडौं- नेपाली राष्ट्रिय क्रिकेट टिमका पूर्व कप्तान सन्दीप लामिछानेलाई ८ वर्ष कैद सजाय तोकिएको छ ।

बलात्कारको मुद्दामा उनलाई जिल्ला अदालत काठमाडौंले बुधबार यस्तो फैसला गरेको हो । गत पुस १३ मा लामिछाने बलात्कार मुद्दामा दोषी ठहर भएका थिए ।

जिल्ला अदालतका न्यायाधीश शिशिरराज ढकालको एकल इजलासले उनलाई दोषी ठहर गरेको थियो । बुधबार ढकालकै इजलासले उनलाई सजाय तोकेको हो ।
उनीविरुद्ध गौशाला २६ ले मुद्दा दायर गरेकी थिइन् । अदालतले पीडितलाई ५ लाख रुपैयाँ क्षतिपूर्ति भराउने फैसला पनि गरेको छ ।

सन्दीपले यो फैसलामा चित्त नबुझे माथिल्लो अदालतमा पुनरावेदन गर्न पाउनेछन् । त्यसैले उनी तत्काल पक्राउ नपर्ने सम्भावना बढी छ ।