शीतलपाटीन्युज डटकम।
काठमाण्डौ। गैरआवासीय नेपाली संघको महिला उपाध्यक्षमा टिका गुरुङ निर्विरोध निर्वाचित भएकी छन्। एनआरएनएको १२औँ महाधिवेशन यही मार्च १४-१६ मा काठमाडौँको होटल सोल्टीमा हुँदैछ।

प्रधानमन्त्री सुशीला कार्कीले समुद्‌घाटन गर्ने कार्यक्रम रहेको अन्तर्राष्ट्रिय एकता महाधिवेशनमा बुधबार उम्मेदवारी दर्ताको कार्यक्रम रहेको थियो। महिला उपाध्यक्ष उम्मेदवार गुरुङको एक्लो उम्मेदवारी परेको हो। गुरुङले यसअघि एनआरएनएको महिला सचिवको जिम्मेवारी पूरा गरिसकेकी छन्। १०औँ र ११ औँ महाधिवेशनबाट दुई कार्यकाल गुरुङले महिला सचिवको जिम्मेवारी पूरा गरेकी हुन्।

१२औँ महाधिवेशनमा भने एक्लो उम्मेदवारी परेपछि उनी निर्विरोध भएकी छिन्। हाल काठमाडौँमै रहेकी गुरुङले निर्वाचनमा उमेदवार भयर निर्बिरोध भयपछि आफ्नो धारणा राख्दै ‘यसअघि महिला सचिव रहँदा मैले महिलाको हक, अधिकार र सशक्तीकरणका लागि गरेको योगदानको कदर भएको महसुस गरेको छु। यो कदरले मलाई थप जिम्मेवारीबोध गराएको छ।’

जिम्मेवारी थपिएसँगै अब अझ खटिएर महिला हक-हित र सशक्तीकरणका लागि काम गर्ने उनले बताइन्। वैदेशिक रोजगारीमा भएका महिला,उनीहरूको सुरक्षित रोजगार,रोजगारीबाट फर्केर आएपछि रिटर्नी सिपको सदुपयोग जस्ता कार्यमा लागिपर्ने गुरुङ बताउँछिन्।