काठमाडौं– मध्यपुरथिमि नगरपालिका–६ राईटोल माथिल्लो कुण्डोल बस्ने ४९ वर्षीय आत्माराम केसी र ४१ वर्षीय हरिशरण केसीको तीन तले घरमा आज बिहान आगलागी हुँदा एकको मृत्यु भएको छ भने एक घाइते भएका छन् ।

आज बिहान करिब ८ बजे भएको आगलागीमा परेर आत्मारामकी छोरी २५ वर्षीया अस्मिताको पौने ९ बजे घरमै मृत्यु भएको महानगरीय प्रहरी परिसरका प्रहरी नायब उपरीक्षक राजु पाण्डेलेबताए । उनी सुस्तमनस्थिति र प्यारालाइसिस पीडित रहेको बताइएको छ ।

आगलागीमा परेर सोही घरको हरिशरणकी छोरी १४ वर्षीया नित्मा केसीलाई उद्धार गरी उपचारका लागि नेपाल कोरिया मैत्री नगरपालिका अस्पताल थिमी लगिएको उनले बताए ।

बिहान आगलागी भएपछि नेपाल प्रहरी, नेपाली सेना, सशस्त्र प्रहरी बल, जुद्ध बारुणयन्त्रका दुई दमकल र स्थानीयवासीको सहयोगमा बिहान ९ बजे आगो नियन्त्रणमा लिएको प्रहरीले जनाएको छ ।

घटनाबारे थप अनुसन्धान भइरहेको र क्षति विवरण सकलन जारी रहेको प्रहरीले जानकारी दिएको छ ।