काठमाडौं– मार्च महिना झन्डै एक लाख पर्यटक नेपालमा भित्रिएका छन्। सन् २०२३ को मार्च महिनामा कुल ९९ हजार चार सय २६ जना पर्यटक भित्रिएको नेपाल पर्यटन बोर्डले जनाएको छ ।
यो संख्या अघिल्लो महिनाको तुलनामा २६ हजार एक सय ७१ जनाले बढी हो। गत फेब्रुअरीमा ७३ हजार दुई सय ५५ जना पर्यटक भित्रिएका थिए।
यस महिना सबैभन्दा धेरै २५ हजार नौ सय ११ जना भारतीय पर्यटक भित्रिएका छन्। त्यस्तै, अमेरिकाबाट ९ हजार पाँच सय ५७, बेलायतबाट ६ हजार एक सय ३३, जर्मनीबाट चार हजार एक सय ४९ र श्रीलंकाबाट तीन हजार आठ सय ९८ जना पर्यटक भित्रिएका छन्।
नेपाल घुम्न आउनेमध्ये सबैभन्दा धेरै ३३.६ प्रतिशत सार्क मुलुकका पर्यटक छन्। युरोपेली राष्ट्रहरूबाट २३.४ प्रतिशत र अमेरिकी मुलुकबाट ११.३ प्रतिशत पर्यटक आएका छन्।
फेब्रुअरीको तुलनामा जनवरीमा नेपाल भित्रने पर्यटक संख्या कम थियो। जनवरीमा जम्मा ५५ हजार ७४ जना पर्यटक नेपाल घुम्न आएका थिए। यस हिसाबमा पछिल्लो समय पर्यटक आगमको संख्या वृद्धि हुँदै गएको देखिन्छ।
प्रतिक्रिया