काठमाडौं । लागु औषध गाँजा मिसाएर केक बेचेको आरोपमा एक जना पक्राउ परेका छन् । गाँजा मिसाएर केक बनाउने अनि अनलाइनमार्फत बेच्ने गरेको भन्दै प्रहरीले काठमाडौं महानगरपालिका–२९ घट्टेकुलो बस्‍ने २६ वर्षीय विशन मानन्धरलाई पक्राउ गरेको हो ।

विशेष सूचनाको आधारमा लागु औषध नियन्त्रण ब्‍यूरो कोटेश्वरबाट खटिएको प्रहरी टोलीले उनलाई पक्राउ गरेको हो ।

प्रहरीले मानन्धरको साथबाट गाँजाको धुलो १२१ ग्राम, तयारी अवस्थामा रहेको केकको झोल १७८ ग्राम, गाँजा ३ केजी बरामद गरेको छ ।

उनले आफ्नै घरमा विगत १ वर्षदेखि गाँजा मिसावट गरिएका केक बनाएर अनलाइनमार्फत कारोबार गर्दै आएको प्रहरीले जनाएको छ ।