शीतलपाटीन्युज डटकम।
गैर आवासीय नेपाली संघ (एनआरएनए) को अन्तर्राष्ट्रिय समन्वय परिषद् (आईसीसी) को यही मार्च १४,१५ र १६ गते नेपालमा आयोजना हुन गइरहेको महाधिवेशनको सन्दर्भमा आईसीसीका वर्तमान उपाध्यक्षद्वय डा.हेमराज शर्मा र रोजिना प्रधान राईको संयुक्त अरब इमिरेट्स (यूएई) भ्रमणका अवसरमा एक अन्तरक्रिया कार्यक्रम भव्यताका साथ सम्पन्न भएको छ।

गैरआवासीय नेपाली संघ राष्ट्रिय समन्वय परिषद् यूएई तथा नेपाल एसोसियसन (एनआरएनए–यूएई) को संयुक्त आयोजनामा सम्पन्न उक्त कार्यक्रम आईसीसी उपाध्यक्ष डा.हेमराज शर्माको प्रमुख आतिथ्यमा आयोजित भएको थियो। कार्यक्रमको अध्यक्षता एनआरएनए–एनसीसी यूएईका अध्यक्ष टकबहादुर गुरुङले गरेका थिए भने नेपाल एसोसियसन (एनआरएनए–यूएई) का महासचिव कुमार श्रेष्ठले सञ्चालन गरेका थिए।

कार्यक्रममा एनआरएनए–एनसीसी यूएईका सचिव सुमन भण्डारीले स्वागत मन्तव्य व्यक्त गरेका थिए। त्यसैगरी विभिन्न संघ–संस्थाका प्रतिनिधिहरूले शुभकामना मन्तव्य राखेका थिए। शुभकामना व्यक्त गर्नेहरूमा नेपाल पत्रकार महासंघ यूएई शाखाका अध्यक्ष मेघराज सापकोटा,नेपाली बिजनेस काउन्सिलका कोषाध्यक्ष एकेन्द्र थापा, पत्रकार निमेश गिरी,महिला समाज यूएईकी अध्यक्ष सबिता नेपाल,प्रवासी नेपाली मञ्चका अध्यक्ष बाबुराम सापकोटा, नेपाली जनप्रगतिशील मंचका अध्यक्ष लक्ष्मण खनाल,नेपाल एसोसियसनका सल्लाहकार बाबुराम विश्वकर्मा तथा एनआरएनए–आईसीसी सदस्य दीपक खड्का लगायत रहेका थिए।

कार्यक्रमका प्रमुख वक्ता आईसीसी उपाध्यक्ष तथा अध्यक्ष पदका प्रत्याशी डा.हेमराज शर्मा र वर्तमान महिला उपाध्यक्ष तथा उपाध्यक्ष पदकी प्रत्याशी रोजिना प्रधान राईले एनआरएनएको वर्तमान अवस्था,चुनौती तथा भावी योजनाबारे धारणा राखेका थिए।

आयोजक संस्थाले कार्यक्रम सफल बनाउन उपस्थित सम्पूर्ण अतिथि तथा सहभागीहरूलाई धन्यवाद व्यक्त गरेको छ।

– सुमन भण्डारी