सुरेश कोइराला
Baltimore अमेरिकाको मेरील्याण्ड राज्यमा नेपाली मूलका सतीश चापागाईं स्थानीय राजनीतिमा सक्रिय रूपमा अघि बढेका छन्। उनी “हाउस अफ डेलिगेट्स” अन्तर्गत डिस्ट्रिक्ट 7A का लागि उम्मेदवार बनेका छन्।

सामाजिक सञ्जालमा सार्वजनिक गरिएको चुनावी प्रचार सामग्रीमा चापागाईंले “Focus, Protect & Support” भन्ने नारासहित आफूलाई समुदायमुखी र काम गर्ने उम्मेदवारका रूपमा प्रस्तुत गरेका छन्।

उनले आफ्नो प्राथमिकतामा “Affordable Maryland”, “Safe Communities” र “Strong Businesses” लाई राखेका छन्। प्रचार सामग्रीअनुसार चापागाईं हाल मेरील्याण्ड डेमोक्रेटिक पार्टी सेन्ट्रल कमिटीका निर्वाचित सदस्यसमेत हुन्।

त्यस्तै,उनी साना व्यवसायी,बाल्टिमोर काउन्टी पब्लिक स्कुलका दोभाषे,तथा विभिन्न सामुदायिक संस्थामा सक्रिय नेतृत्वकर्ता रहेको उल्लेख गरिएको छ। उनले श्रमिक परिवार,कमजोर समुदाय तथा सार्वजनिक सहभागिताको पक्षमा आवाज उठाउँदै आएको दाबी पनि गरेका छन्।

चापागाईं साहित्यिक क्षेत्रमा पनि सक्रिय रहेको बताइएको छ। प्रचार सामग्रीमा उनलाई सम्पादक,कवि तथा गीतकारका रूपमा परिचय दिइएको छ।

अमेरिकामा नेपाली मूलका व्यक्तिहरू स्थानीय राजनीतिमा क्रमशः सक्रिय बन्दै गएको अवस्थामा सतीश चापागाईंको उम्मेदवारीलाई नेपाली समुदायले चासोका साथ हेरेका छन्।