शीतलपाटीन्युज डटकम।
काठमाण्डौ। पूर्वप्रधानन्यायाधीश चोलेन्द्र शमशेर जबरा पक्राउ महाराजगञ्जस्थित निवासबाटै उनलाई पक्राउ गरिएको प्रहरी उच्च स्रोतले पुष्टि गरेको छ । यसबारे विस्तृत विवरण आउन बाँकी छ। उनलाई अपराध अनुसन्धान कार्यालय टेकुको टोलीले पक्राउ गरेको हो।

काठमाडौंको महाराजगञ्जस्थित घरबाटै उनी गएराति पक्राउ परेका अपराध अनुसन्धान कार्यालय स्रोतले जनाएको छ ।
अपराध अनुसन्धान कार्यालय स्रोतले यसबाहेक थप विवरण भने दिएको छैन।

वकालत पेशा गरिरहेका चोलेन्द्र २०५३ वैशाख १ गते तत्कालीन पुनरावेदन अदालतको अस्थायी न्यायाधीश नियुक्त भएका थिए। लामो समय अस्थायी न्यायाधीश भएका उनी पछि विशेष अदालतको सदस्य पनि भएका थिए।

पुनरावेदन अदालत बुटवलको कामु मुख्य न्यायाधीश भइरहेकै बेला उनी २०७१ मा सर्वोच्च अदालतको न्यायाधीश नियुक्त भएका थिए। २०७५ पुस १८ गते प्रधानन्यायाधीश भएका उनी उमेर हद (६५ वर्ष)का कारण २०७९ मंसिर २७ गते अनिवार्य अवकाशमा गएका थिए।

उनी प्रधानन्यायाधीश रहेकै बेला तत्कालीन सत्तारूढ गठबन्धन (नेपाली कांग्रेस,नेकपा माओवादी केन्द्र लगायतका दल) का सांसदहरूले २०७८ फागुन १ गते जबराविरुद्ध प्रतिनिधिसभामा महाभियोग प्रस्ताव दर्ता गराएका थिए। महाभियोग दर्ता भएसँगै उनी स्वतः निलम्बनमा परेका थिए।

महाभियोग प्रस्ताव संसद्‌मा विचाराधीन रहेकै अवस्थामा उनी अनिवार्य अवकाशमा गएका थिए।
(लोकान्तर न्युजबाट)