काठमाडौं– निकै सानो विद्युतीय उपकरण बनाउन माहिर टाइनीसर्किट्स कम्पनीले विश्वको सबैभन्दा सानो टेलिभिजन सेट सार्वजनिक गरेको छ ।

ओपन सोर्स हार्डवेयर यो कम्पनीले विश्वको सबैभन्दा सानो टेलिभिजन सेट – द टाइनीटीभी टु र टाइजीटीभी मिनी बनाएको छ । पुरानो ढाँचाको जस्तो देखिने यो टिभी कुनै स्ट्याम्पजस्तो देखिएता पनि यसले अन्य साधारण टिभीले झैँ काम गर्छ । यसमा च्यानल फेर्न सकिन्छ, आवाज ठूलो–सानो पार्न सकिन्छ, रिमोट कन्ट्रोलको नियन्त्रण, ८ जीबी स्टोरेज र भिडियो अपलोड गर्नका लागि कम्प्युटरसँग जोड्न सकिनेछ ।

अडिटी सेन्ट्रलका अनुसारटाइनीटीभी टुको १.० इन्च (२६ एमएम) डिस्प्ले छ भने यो अगाडि फर्किएको ०.६ ×०.४ इन्चको स्पिकरमाथि बसेको छ । योभन्दा पनि सानो टाइनीटीभी मिनीको ०.६ इन्च (१५ एमएम) स्क्रिन छ । टाइनीटीभी टुमा आइपीएस टीएफटी डिस्प्ले छ भने टाइनीटीभी मिनीमा ब्राइट ओलेड डिस्प्ले छ । यी दुबैको ८ जीबी इन्टरनल स्टोरेज छ । यसमा पहिले नै धेरै भिडियो अपलोड गरिएका हुन्छन् तथापि नयाँ भिडियो अपलोड गर्नका लागि कम्प्युटरमा कनेक्ट गर्न सकिन्छ ।

यी दुई साना टिभी सेटहरु हाल किकस्टार्टर क्राउडफन्डिङ अभियानको आकर्षकणको केन्द्रमा रहेको छ । उक्त अभियान १५ हजार डलर संकलन गर्ने उद्देश्यसहित सुरु गरिएको थियो तर १० दिनभित्रै यो अभियानले १६५,५०० डलर संकलन गरेको छ । यो अभियानलाई समर्थन गर्नेहरुले टाइनीटीभी टु र टाइनीटीभी मिनीलाई ४९ डलरमा किन्न सक्छन् ।

यस्तै, क्लियर केस भर्सनसहित चाहिएको छ भने ५९ डलर मूल्य पर्छ । उनीहरुलाई इन्फ्रारेड रिमोट चाहिएको छ भने अतिरिक्त १० डलर खर्च गर्नुपर्ने हुन्छ । एजेन्सी