शीतलपाटीन्युज डटकम।

काठमाण्डौं। बढुवा नियुक्ति पाएका प्रहरी सहायक हवल्दारदेखि प्रहरी वरिष्ठ नायव निरीक्षकसम्मका प्रहरी कर्मचारीहरूले अब तोकिएको दरबन्दीमा हाजिर भएपछि मात्रै दर्ज्यानी चिन्ह प्रदान गरिने व्यवस्था लागू गरिएको छ।

नेपाल प्रहरी प्रधान कार्यालयले जारी गरेको निर्देशनअनुसार,
बढुवा भएपछि पदस्थापन भई तोकिएको कार्यालयमा हाजिर नगरी पुरानै कार्यालयमा कामकाज गर्ने प्रवृत्तिका कारण जनशक्ति व्यवस्थापनमा समस्या देखिएको भन्दै अब उक्त व्यवस्था कडाइका साथ कार्यान्वयन गर्न सबै प्रहरी कार्यालयलाई निर्देशन दिइएको हो।

यसअघि कार्यरत कार्यालयबाटै दर्ज्यानी चिन्ह सुशोभन गरिँदा कतिपय प्रहरी कर्मचारीहरू नयाँ पदस्थापन भएको कार्यालयमा समयमै हाजिर नहुने गरेको पाइएको थियो। यसले प्रहरी संगठनको दैनिक कार्य सञ्चालन र जनशक्ति परिचालनमा प्रत्यक्ष असर परेको प्रहरी प्रधान कार्यालयले जनाएको छ।

अब उप्रान्त बढुवा भई दरबन्दी कायम भएका प्रहरी कर्मचारीहरूले सम्बन्धित कार्यालयमा हाजिर भएको पुष्टि भएपछि मात्रै सोही कार्यालयका तोकिएका प्रहरी अधिकृतमार्फत दर्ज्यानी चिन्ह सुशोभन कार्यक्रम आयोजना गरिने व्यवस्था गरिएको छ। उक्त प्रणाली कार्यान्वयनका लागि सबै प्रहरी कार्यालयहरूलाई औपचारिक रूपमा परिपत्र गरिएको जनाइएको छ।

प्रहरी संगठनभित्रको अनुशासन, पारदर्शिता र प्रभावकारी जनशक्ति व्यवस्थापन सुनिश्चित गर्ने उद्देश्यले लागू गरिएको यस व्यवस्थालाई आईजीपी कार्कीको नयाँ र दूरदर्शी योजनाका रूपमा लिइएको छ, जसको प्रहरी संगठनभित्र तथा सरोकारवालाहरूबाट व्यापक प्रशंसा भइरहेको छ।
(सुरक्षासरोकार डटकमबाट)