शीतलपाटीन्युज डटकम।
लन्डन। नेपालमा विपद्‌बाट प्रभावित समुदायको सहयोगार्थ बेलायतस्थित ‘किङ्स हेड होटल’ र ‘रिजेन्सी ५९’ ले संयुक्त रूपमा आयोजना गरेको ‘नेपालका लागि परोपकारी रात्रिभोज’ (डाइन फर नेपाल) कार्यक्रममार्फत २,२४३ पाउन्ड (करिब ४ लाख ५७हजार नेपाली रुपैयाँभन्दा बढी) सङ्कलन गरी प्रधानमन्त्री दैवी प्रकोप उद्धार कोषमा जम्मा गरिएको छ।

एबर्गभिनी स्थित नेपाली तथा स्थानीय समुदायको सहभागितामा आयोजित च्यारिटी डिनर (परोपकारी भोजन) कार्यक्रममा सङ्कलित सम्पूर्ण रकम नेपालका प्रभावित क्षेत्रका बासिन्दाहरूसम्म प्रत्यक्ष रूपमा पुर्‍याउने उद्देश्यले नेपाल सरकारको आधिकारिक कोषमा पठाइएको आयोजकले जनाएका छन्। स्यान्तान्डर बैङ्कमार्फत सन् २०२६ सेप्टेम्बर १४ का दिन प्रधानमन्त्री दैवी प्रकोप उद्धार कोषको आधिकारिक खातामा सो रकम हस्तान्तरण गरिएको जनाइएको छ।

रकम पठाउँदा लागेको बैङ्किङ शुल्क (२५ पाउन्ड) आयोजक आफैँले व्यहोरेर सङ्कलित सम्पूर्ण रकम नेपाल पठाइएको हो।
कार्यक्रममा स्थानीय बासिन्दा,गैरआवासीय नेपाली तथा विभिन्न समुदायका प्रतिनिधिहरूको उत्साहजनक उपस्थिति रहेको थियो।
सो अवसरमा नेपालको सहयोगार्थ उपहार चिठ्ठा (राफल/भाग्यशाली चिठ्ठा) कार्यक्रम पनि आयोजना गरिएको थियो, जसको विजयी टिकट नम्बर १४६,१०३ रहेको छ।

आयोजक संस्थाका प्रतिनिधिहरूले नेपालमा अप्ठ्यारो परेको बेला साथ दिन पाउँदा खुसी व्यक्त गर्दै भनेका छन्, “हामीले सँगै भोजन गर्यौँ,सँगै सहयोग गर्यौँ र अब सँगै पुनर्स्थापनामा जुट्दै छौँ।”

यस कार्यक्रमलाई सफल बनाउन सहयोग पुर्‍याउने, सहभागी हुने तथा चन्दादाता सबैप्रति आयोजकले हार्दिक आभार व्यक्त गरेका छन्। विदेशमा रहेर पनि आफ्नो मातृभूमिको दुःखमा मल्हम लगाउने उद्देश्यले गरिएको यस प्रयासको स्थानीय तथा गैरआवासीय नेपाली समुदायबाट उच्च प्रशंसा भइरहेको छ।