काठमाडौं – केपी ओली कप राष्ट्रिय फुटबल च्याम्पियनसिपको उपाधि ’ए’ डिभिजन क्लब मछिन्द्र फुटबल क्लबले हात पार्न सफल भएको छ।

दशरथ रंगशालामा बुधवार भएको खेलमा मछिन्द्रले सातदोबाटो युथ क्लवलाई टाइब्रेकरमा ५–३ गोल अन्तरले हराएको छ।

बिजेता टोली मछिन्द्रले १० लाख नगद प्राप्त गरेको छ भने उपबिजेता टोली सातदोबाटोले ५ लाख नगद प्राप्त गरेको छ ।

निर्धारित ९० मिनेटको खेलमा १–१ गोलको बराबरी भएपछि खेल पेनाल्टीमा पुगेको हो। पेनाल्टीमा मछिन्द्रका रञ्जित धिमाल, दिवाकरचौधरी, सुजल श्रेष्ठ, पुजन उपरकोटी र ओमोलाजा नुरेन करिमले गोल गरेका छन।

सातदोबाटोका तर्फबाट निरज चौधरी, दिपेन राज सिंह र एक राज बुढाथोकीले गोल गरेका थिए।खेलको पाचौं मिनेटमा आफिज ओलावालेले गोल गर्दै मछिन्द्रलाई अग्रता दिलाउन सफल भएका थिए।खेलको १८ औं मिनेटमा जोर्डन ओवानाले गोल गर्दै सातदोबाटोलाई १–१ गोलको बराबरीमा ल्याएका थिए।