काठमाडौँ- फिल्म ‘नालापानी’को विशेष प्रदर्शन गरिएको छ। चलचित्र विकास बोर्डको हलमा गरिएको विशेष प्रदर्शनमा नेपाल सरकारका ८० जना विशिष्ट व्यक्तिलाई फिल्म देखाइएको छ।

विशेष प्रदर्शनमा सञ्चार तथा सूचना प्रविधि मन्त्रालयका सचिव डा‍. वैकुण्ठ अर्याल, नेपाली सेनाका पूर्व प्रधानसेनापति राजेन्द्र क्षेत्री, नेपाली सेनाका बलाधिकृत जनरल शरदप्रताप राणा, केन्द्रीय चलचित्र जाँचपास समितिका अध्यक्ष सेवन्तक पोखरेल, नेपाल सरकारका पूर्वसचिव भीम उपाध्याय लगायत थिए।

फिल्मले सन् १८१४ मा भारत, देहरादुनस्थित नालापानी गढीमा भएको अंग्रेज(नेपाल युद्धको कथा प्रस्तुत गरेको छ। नेपाली फौजका तर्फबाट कप्तानी गरेका बलभद्र कुँवरले लडेको त्यो ऐतिहासिक लडाइँलाई फिल्ममा छ। कुँवर र उनका छ सय सैनिकले नालापानी युद्धमा देखाएको साहस र बहादुरीको कथा फिल्ममा छ।

रिमेश अधिकारीको निर्देशनमा बनेको फिल्म कात्तिक ४ मा रिलिज हुनेछ। फिल्ममा देशभक्त खनाल, अर्जुनजंग शाही, सन्तोष पन्त, मनोज शाक्य, विशाल पहारी, विजय विष्फोट, पूजना प्रधान, गीता अधिकारीलगायत कलाकारको अभिनय छ।